30-апрелге караган түнү Орусиянын армиясы Украинанын Днепр жана Харьков облустарына дрондор менен жапырт сокку урду.
Днепрде жер тамдар талкаланып, бир киши каза тапканы кабарланды.
Харьков облустук аскердик администрациясынын башчысы Олег Синегубов аймакка орус армиясы 16 дрон менен чабуул койгонун билдирди.
40тан ашуун киши ар кандай жараат алды. Көп кабаттуу үйлөр жана жер тамдар, медициналык мекемелер, жарандык инфраструктурага зыян келтирилгени белгилүү болду.
Орусия Украинадагы согушка тарткан түндүк кореялык 600дөй аскер каза болуп, дагы миңдегени ар кандай жараат алганын Reuters жана AFP агенттиктери Түштүк Корея парламентинин чалгын боюнча комитетинин өкүлүнө таянып билдирди.
«Бүгүнкү күндө Түндүк Кореянын жоготуусу 600дөй аскерди кошкондо болжолдуу түрдө 4700 киши деп эсептелди», — деди журналисттерге түштүк кореялык депутат Ли Сон Квун өз өлкөсүнүн Улуттук чалгын кызматы депутаттар үчүн өткөргөн брифингден кийин.
Анын айтымында, быйыл жыл башынан бери Түндүк Кореяга 2 миңдей аскер кайткан, бирок алар Пхеньянда жана башка жерлерде кармалып турат.
«Менин түшүнгөнүмчө өлгөндөрдүн сөөгү Курскиде кремация болуп, андан кийин күлү Түштүк Кореяга жеткирилген», — деп кошумчалады ал.
Өткөн аптада Пхеньян алгачкы жолу Түндүк Кореянын аскерлери Украинага каршы согушка аралашканын ырастаган.
Мамлекеттик KCNA агенттиги жазган маалыматка караганда, аскерлерди жөнөтүү "Түндүк Кореянын лидери Ким Чен Ындын буйругуна" ылайык жана эки өлкөнүн ортосунда түзүлгөн ар тараптуу стратегиялык өнөктөштүк тууралуу келишимге ылайык жүзөгө ашырылган.
Пхеньяндын бул билдирүүсү орус Куралдуу күчтөрүнүн Башкы штабынын жетекчиси Валерий Герасимов Курск облусундагы согуштук кырдаал тууралуу маалымдаган соң жарыяланды. Анда генерал Орусиянын президенти Владимир Путинге аймактагы кырдаал тууралуу баяндап жатып, "түндүк кореялык аскерлер облусту бошотууда чоң жардам көрсөткөнүн" билдирди.
Түндүк кореялык аскерлердин Курскидеги салгылаштарга катышып жатканы тууралуу расмий Сеул, Кошмо Штаттар, Батыш мамлекеттери жана украин бийлиги буга чейин эле кабарлап келген. Москва менен Пхеньян расмий бышыктаган да, так четке каккан да эмес.
Орусиянын Белгород облусунда дрон чабуулунан эки киши каза тапканын, дагы үчөө жараат алганын аймактын губернатору Вячеслав Гладков билдирди.
Маалыматта 29-апрелде дрон Украина менен чек арага жакын жерде Грайворон — Илек-Пеньковка жолунда автоунаага тийген.
Украинанын президенти Владимир Зеленский Орусия лидери Владимир Путиндин Жеңиш күнүнө байланыштуу согушту үч күнгө токтотуу сунушун катуу сынга алды. 28-апрелде Кремль тараткан билдирүүгө ылайык, Путин Жеңиш күнүнө байланыштуу ок атышууну убактылуу токтотууну сунуштаган.
Зеленский бул сунушту шылдың катары кабыл алып, атышууну токтотууну күтүүнүн зарылдыгы жок экенин айтты:
"Эмнеге баары 8-майга чейин күтүп, анан гана атышууну токтотушат? Болгону Путиндин парады учурунда тынчтык болсун деген шылтоо. Биз үчүн парад эмес, адам өмүрү кымбат. Атышууну токтотуу үчүн 8-майга чейин күтүүнүн эч кандай зарылдыгы жок экенине ишенебиз, дүйнө да ишенет. Бир нече күнгө токтотуп, кайрадан адамдарды өлтүрүп баштоонун эмне кереги бар? Ок атышууну жок дегенде 30 күнгө дароо, толук жана эч кандай шартсыз токтотуу керек".
Украин президенти ошондой эле АКШ тарабынан сунушталган ок атышууну токтотуу демилгеси дагы эле күчүндө экенин эске салды. Вашингтондун демилгесине украин бийлиги макул болгон. Ал эми Орусия ар кандай шарттарды коюп, азырынча четке кагууда. Ушуну менен соңку бир айда Кремль ок атышууну убактылуу токтотууну экинчи жолу сунуштап жатат. Буга чейин Пасха майрамын утурлай ушундай демилге көтөрүлгөн. Бирок анда эки тарап тең келишимдин шартын бузуп, ок атты деп бири-бирин айыптаган.
28-апрелде Украинада орус соккусунан каза болгон 17 жаштагы Даниял Худиянын тажыясы өттү. Ал Киевдеги ракеталык чабуулда набыт болгон. Бул чабуулда анын ата-энеси да каза тапкан. Жалпысынан 12 адамдын өмүрү кыйылган.