Украинанын президенти Владимир Зеленский АКШнын жана Орусиянын мамлекет башчылары менен үч тараптуу жолугушууга даярдыгын билдирди.
«РБК-Украина» маалымдагандай, бардык тараптар андай макулдук тууралуу кабардар кылынды.
«Биз «Трамп-Путин-мен» форматына даярбыз, «Трамп-Путин», «Трамп-Зеленский» андан кийин үч тараптуу кездешүүгө даярбыз. Чачыранды эмес бир эле убакытта жүргөн сүйлөшүүлөрдү айтып жатам», - деп билдирди украин президенти.
Ал ошондой эле Киев Ватикандагы же Швейцариядагы техникалык жолугушууларга даяр экенин белгиледи.
«Жогорку деңгээлдеги жолугушуу, тараптар кааласа, алдын ала даярдыксыз деле өтүшү мүмкүн» - деп кошумчалады Зеленский.
Ал эми коопсуздук кепилдиктери тууралуу сүйлөшүүлөргө европалыктардын да катышуусун кааларын айтты.
Президенттин дагы бир комментарийине ылайык, Москва тынчтык сүйлөшүүлөрүн Беларуста уюштурууну сунуш кылган, бирок ал өлкө Орусиянын 2022-жылкы кол салуусуна катышкандыктан Киев аны кабыл албайт.
Ал эми Орусиянын тышкы иштер министри Сергей Лавров орус-украин сүйлөшүүлөрүнүн жаңы айлампасы тууралуу “эң жакынкы арада кабарланарын” 28-майда билдирди. Бул тууралуу ТАСС агенттиги жазды.
Лавров Москва Украинадан мурдагыдай эле “бардык дискриминациялык мыйзамдардын” жоюлушун, өлкөнүн ядролук куралга ээ болбошун талап кыларын айтты.
Шейшембиде Ак үйдүн атайын чабарманы Кит Келлог Трамп, Путин жана Зеленскийдин кездешүүсү Женевада өтүшү ыктымал деп билдирген. Дипломаттын айтымында, Украина ок атууну токтотуу шарттары камтылган документти тапшырды, эми орус тараптан ушундай эле меморандум күтүлүп жатат.
Орусиянын Коргоо министрлиги 28-майга караган түнү 269 украиналык дрон атып түшүрүлгөнүн билдирди. Маалыматка караганда, бул согуш башталгандан берки эң масштабдуу чабуул болушу мүмкүн. Мекеме абадан коргонуу системалары 13 региондо иштегенин кошумчалады.
Бирок канча пилотсуз учак катышканы, канчасы бутага тийгени айтылган жок. Кээ бир кабарларга ылайык, Орусиянын аскердик өнөр жай комплексинин ишканалары зыян тарткан учурлар бар.
Соккулардын бири Москванын Зеленоград районунда электроника чыгарган «Элма» компаниясы орун алган технопаркка урулду. Жабыркагандар тууралуу кабарланган жок.
Баш калаанын жанындагы Дубна шаарында дрон чыгарган «Кронштадт» заводу бутага алынганын Astra телеграм-каналы жазды.
Подмосковьеде үч турак жайга зыян келтирилди. Внуково, Домодедово, Жуковский жана Шереметьево аэропортторунун иши бир нече убакытка үзгүлтүккө учурады.
Чабуулдарга Калуга, Брянск облустары да кабылганын жергиликтүү бийликтер маалымдады.
Киев түнкү соккуларды комментарийлеген жок.
Алдыңкы күнү кечки теле кайрылуусунда украин президенти Владимир Зеленский Москва Украинага май айында урган жапырт дрон соккулары үчүн жооп берүүгө тийиш деп билдирди.
Өз кезегинде Орусия шаршембиге оогон түнү украин аймагын 88 пилотсуз учак менен аткылаганын Украинанын Абадан коргоо күчтөрү эртең менен маалымдады. Аскерлер 71 жабдык атып түшүрүлгөнүн же өз алдынча кулаганын кошумчалашты.
Кабарларга караганда, дрондор 8 жерде түрдүү жайларга тийген. Бирок анын чоо-жайы айтылган жок. Дрондордон тышкары Украина баллистикалык жана башкарылган канаттуу ракеталардын аткылоосуна туш болду.
Москва бул соккуларды комментарийлеген жок.
Бир жумадан бери Орусия кошуна өлкөсүнүн шаар-кыштактарына чабуулдарын күчөтүп, өткөн дүйшөмбүнүн түнүндө 355 пилотсуз учак менен аткылаган.
АКШнын президенти Дональд Трамп орус президенти Владимир Путинди дагы сындап, эгер анын саясаты болбосо Орусия "олуттуу көйгөйлөргө кабылмактыгын" айтты.
Ал өзүнүн Truth Social соцтармагындагы баракчасы аркылуу "Владимир Путин эгер мен болбосом Орусияда абдан көп жаман иштер болмоктугун, АЯБАЙ ЖАМАН болмоктугун түшүнбөй жатат. Ал от менен ойноп жатат",-деп билдирди.
Трамп адаттагыдай эле айрым сөздөрдү чоң тамга менен белгилеп жазды.
АКШнын президенти соңку билдирүүсүндө эмнеден улам доомат коюп жатканын тактаган жок. Бирок дүйшөмбү күнү ал Орусиянын Украинага жасаган соңку жапырт чабуулунун улам Путинди сындап, ал "көп адамдарды өлтүрүп жатат", "акылынан такыр айнып калды" деп билдирген.
Кремл мындай дооматтарга комментарий бере элек.
Wall Street Journal басылмасы өз булактарына таянып Трамп ушул аптада Орусияга санкция салуу мүмкүнчүлүгүн карап жатканын жазган. АКШнын президенти Украина менен Орусиясынын тынчтык сүйлөшүүлөрүн өткөрүү аракеттеринен чарчаганын, эгер андан майнап чыкпаса бул процесстерге катышуудан баш тартууну дагы караштырып турганын белгилеген.
Стамбул шаарында 16-майда 2022-жылдын жаз айларынан бери алгачкы орус-украин бетме-бет сүйлөшүүсү өткөн. Бирок анын жүрүшүндө ок атышууну токтотуу макулдашылган эмес, Киев Москваны "аткарылгыс талаптарды коюп жатат" деп айыптаган.
Буга чейин Трамп Путин менен жолукмайынча тынчтык сүйлөшүүлөрүнөн эч кандай натыйжа болбой турганын айтып келген. Кошмо Штаттарынын президенти Ак үйгө кайтып келгенден бери Украинадагы согушту токтотуу аракетин көрөрүн такай билдирип жатат.
Орусия шейшембиге караган түнү украин аймагын 60 дрон менен аткылап, 43ү атып түшүрүлдү же өздөрү кулады. Бул тууралуу Украинанын абадан коргонуу күчтөрү билдирди.
Маалыматка караганда, 9 пилотсуз учак бутага тийген, бир нече жерде аппараттардын сыныктары кулаган. Бирок кайсы жайлар бутага алынганы айтылган жок.
Днепропетровск облусунун администрациясы беш дрон атып түшүрүлгөнүн, чабуулдан айыл чарба ишканасы жабыркаганын, эки киши жараат алганын маалымдады.
Сумы облусунун жетекчилиги кабарлагандай, өнөр жай ишканасын өрт чалды, транспорт зыян тартты.
Бул соккуларды Москва комментарийлеген жок.
Анын алдында Орусия үч түн катары менен кошуна өлкөсүнүн аймагына дрон жана ракеталар менен жапырт чабуул коюп келген. Дүйшөмбүгө оогон түнү 355 пилотсуз учак атылып, согуш башталгандан бери эң масштабдуу сокку болуп калды.
АКШнын президенти Дональд Трамп орус мамлекет башчысы Владимир Путинди украин шаар-кыштактарына урулган соккулар үчүн катуу айыптады.
Орус армиясы аскердик жайларды бутага алганын айтууда.
Ал ортодо WSJ басылмасынын ырасташынча, Трамп тынчтык сүйлөшүүлөрүн өткөрүү аракеттеринен чарчады жана андан майнап чыкпаса бул процесстерге катышуудан баш тартууну караштырып жатат.
Ошол эле маалда мындай сүйлөшүү жараянынан АКШ чыкса эмне болору, Вашингтон Киевге аскердик жардам көрсөтүүсүн улантабы же жокпу, белгисиз.
Ак үйдүн басма сөз катчысы Кэролайн Ливитт бул басылмага "президент Трамп сүйлөшүү жолу менен тынчтык келишимине жетүү керектигин так билдирди" деген оюн айткан.
16-майда Вашингтондун арачылыгы менен Стамбулда Москва менен Киевдин үч жыл мурун үзгүлтүккө учураган тынчтык сүйлөшүүлөрү уланган. Бирок ок атышууну токтотуу тууралуу тараптар макулдашууга жеткен жок.