Кошмо Штаттарынын президенти Дональд Трамп ушул аптада Орусияга санкция салуу мүмкүнчүлүгүн карап жатат. Бул тууралуу Wall Street Journal басылмасы өз булактарына шилтеме кылып жазды. Ага ылайык, жаңы банктык тыюулар болбошу мүмкүн, бирок орус президенти Владимир Путинди тынчтык сүйлөшүүлөрүнө барышы үчүн кепке-сөзгө келтирип, ага басым кылуунун башка варианттары каралып жатат.
WSJ басылмасынын ырасташынча, Трамп тынчтык сүйлөшүүлөрүн өткөрүү аракеттеринен чарчады жана андан майнап чыкпаса бул процесстерге катышуудан баш тартууну караштырып жатат.
Ошол эле маалда мындай сүйлөшүү жараянынан АКШ чыкса эмне болору, Вашингтон Киевге аскердик жардам көрсөтүүсүн улантабы же жокпу, белгисиз.
Ак үйдүн басма сөз катчысы Кэролайн Ливитт бул басылмага "президент Трамп сүйлөшүү жолу менен тынчтык келишимине жетүү керектигин так билдирди" деген оюн айткан.
Трамптын сүйлөшүү процесстеринен чыгышы мүмкүндүгүн New York Times дагы жазган, бирок басылманын булактары АКШнын президенти европалык лидерлерге Москвага каршы санкцияларды катаалдатуу ниети жоктугун ишара кылганын айтып берген.
Трамп Орусиянын Украинага жасаган соңку ири чабуулдарынан улам Путинди сындаган. Ал өзүнүн Truth Social соцтармагындагы баракчасына Путинге "ичи чыкпай" жатканын белгилеп, аны "акылынан айнып калган" деп айыптаган. Ошол эле маалда украин президенти Владимир Зеленскийди дагы доомат койгон.
Стамбул шаарында 16-майда согуш башталган үч жылдан берки алгачкы орус-украин бетме-бет сүйлөшүүсү өткөн. Бирок анын жүрүшүндө ок атышууну токтотуу макулдашылган жок, Украина Орусияны "аткарылгыс талаптарды коюп жатат" деп айыптаган.
Буга чейин Трамп Путин менен жолукмайынча тынчтык сүйлөшүүлөрүнөн эч кандай натыйжа болбой турганын айтып келген. Кошмо Штаттарынын президенти Ак үйгө кайтып келгенден бери Украинадагы согушту токтотуу аракетин көрөрүн такай билдирип жатат.
АКШнын президенти Дональд Трамп Орусиянын Украинага жасаган соңку ири чабуулунан улам орус президенти Владимир Путинди сындады.
Ал өзүнүн Truth Social соцтармагындагы баракчасына Путинге "ичи чыкпай" жатканын белгилеп, аны "акылынан айнып калган" деп айыптады. Ошол эле маалда украин президенти Владимир Зеленскийди дагы сындады.
"Орусиянын президенти Владимир Путин менен такай жакшы мамиледе элем, бирок ага бир нерсе болгон окшойт. Ал такыр эле акылынан айнып калды! Ал атайлап көп кишини өлтүрүп жатат, мен жоокерлер тууралуу эле айтып жаткан жокмун. Ракеталар, дрондор менен Украинанын шаарларын эч себепсиз эле аткылап жатат. Ал (Зеленский - ред.) айткан нерселердин баары проблема жаратат. Мага бул жакпай турат, ушунун баары бүтсө болот эле. Эгер мен президент болуп турганымда бул согуш такыр башталбайт эле. Бул Зеленскийдин, Путиндин жана Байдендин согушу, меники эмес",-деп жазды Трамп.
Кремл бул билдирүүгө азырынча комментарий бере элек.
Өткөн аптада Трамп кызматка киришкенден бери Путин менен телефондон үчүнчү жолу сүйлөшкөн. АКШнын президенти соңку баарлашууну "эң мыкты" деп баалаган. Truth Social соцтармагындагы баракчасына Москва менен Киев ок атышууну токтотуу, элдешүү тууралуу "токтоосуз" сүйлөшөт деп жазган.
Өз кезегинде Путин бул сүйлөшүү тууралуу комментарий берип жатып Киев менен "Украинага байланыштуу болочоктогу тынчтык келишими тууралуу меморандумдун" үстүнөн иштөөгө даярдыгын билдирген.
Стамбул шаарында 16-майда согуш башталган үч жылдан берки алгачкы орус-украин бетме-бет сүйлөшүүсү өткөн. Бирок анын жүрүшүндө ок атышууну токтотуу макулдашылган жок, Украина Орусияны "аткарылгыс талаптарды коюп жатат" деп айыптаган.
Буга чейин Трамп Путин менен жолукмайынча тынчтык сүйлөшүүлөрүнөн эч кандай натыйжа болбой турганын айтып келген. Кошмо Штаттарынын президенти Ак үйгө кайтып келгенден бери Украинадагы согушту токтотуу аракетин көрөрүн такай билдирип жатат.
Орусия 25-майга караган түнү Украинанын бир нече аймагын ракета жана дрондор менен жапырт аткылаган. Соккуларда бир нече жайкын адамдын өмүрү кыйылган, дагы бир топ киши жараат алган.
Орусиянын Швециядагы элчилигинин короосуна белгисиз бирөөлөр дрон менен боёк куюлган айнек идиш ташташканын 25-майда элчилик билдирди.
Мекеменин Telegram каналына чыккан маалыматка караганда, элчиликтин үстүнөн учуп өткөн учкучсуз учак боёкту элчиликтин кире беришине жакын жерге таштаган.
Элчилик кызматкерлер арасында жабыркагандар бар же жогун тактаган жок, бирок айнек идиш бийиктен ыргытканда сынып, зыяны тийиши толук мүмкүн болгонун белгилеп, муну "цинизм" деп атады.
Мындай окуя биринчи жолу болуп жатпаганын белгилеген элчилик жоопкерчилик толук бойдон Швеция бийлигинде экенин кошумчалады. Орусиянын Тышкы иштер министрлигинин расмий өкүлү Мария Захарова дүйшөмбү күнү Швеция нааразылык нотасын аларын айтты.
Акыркы жолу ушул сыяктуу окуя болгону 15-апрелде кабарланган. Анда "мындай мүнөздөгү окуя 11-жолу катталып жатканы" айтылган.
Швеция 2022-жылдын февралынан бери Орусиянын толук масштабдуу агрессиясына каршы күрөшүп жаткан Украинага жардам берип келаткан Европа өлкөлөрүнүн бири.
Украина Орусиянын туткунунда жаткан дагы 303 жаранын кайтарып алганын билдирди. Өлкө президенти Владимир Зеленский 25-майда социалдык түйүндөр аркылуу:
"303 украиналык коргоочу өз үйүндө. Түркияда макулдашылган 1000/1000 алмашуу келишиминин үчүнчү бөлүгү аяктады. Бүгүн Куралдуу Күчтөрүбүздүн, Улуттук гвардиянын, Мамлекеттик чек ара кызматынын, Мамлекеттик атайын транспорт кызматынын жоокерлери мекенине кайтып келүүдө. Бул айырбаштоону ийгиликтүү ишке ашыруу үчүн күнү-түнү иштеген командага ыраазычылык билдирем. Биз ар бир жараныбызды орус туткунунан сөзсүз кайтарабыз", - деп кабарлады.
Кезектеги туткун айырбаштоо жараянын 1000/1000 форматында жүргүзүүнү эки тарап жакында Стамбулда өткөн түз сүйлөшүүдө макулдашышкан.
Бул жараян 23-майда башталып, туткун айырбаштоо Украинанын Беларус менен чек ара тилкесинде өткөн. Беларус Орусиянын эң жакын союздашы. Расмий Минск Москванын Украинага каршы согушун колдоп чыккан.
23-майда 307, ал эми 24-майда 390 украиналык орус туткунунан бошотулган. Зеленский "Эки күндө 697 киши кайтарылды. Алардын 273үн Донецк облусунан кармап кетишкен, көбүн 2022-жылы. Калгандары Херсон, Запорожье, Харьков жана Луганск облусунун аймагында туткунга түшкөндөр. Биздин максат — баарын, орус туткунундагы ар бир кишини алып келүү. Муну ишке ашырыш үчүн өнөктөштөрүбүз менен иштешип жатабыз", — деп 24-майда жазган.
Жараян жүрүп жаткан үч күн бою Украинанын бир нече аймагын, борбор калаасын Орусия түнкүсүн ракета жана дрон менен аткылап жатты. Жекшембиге караган түнкү чабуулдардан кеминде 12 өмүр кыйылды.
Зеленский 25-майда орус бийлигинин агрессиясын айыптап, эл аралык коомчулукту, АКШны, "үн катпай жатышат" деп сындады:
"Орустардын мына ушундай ар бир террордук соккусу - Орусияга каршы жаңы санкцияларды жарыялоого жетиштүү себеп. Орусия согушту создуктуруп, күн сайын адамдарды өлтүрүп жатат. Тынчтыктын жолун тапса болот, бирок согуш дагы эле уланууда. Муну көз жаздымда калтырган болбойт. Американын үн катпай турганы, башкалардын унчукпай турганы Путинге дем гана берүүдө".