Кыргызстандын Финансы министрлиги 23-майда жалпы суммасы 2 млрд 250 млн сом болгон мамлекеттик казыналык облигацияларды (МКО) чыгарды. Аукцион тууралуу маалыматты Улуттук банк жарыялады.
Беш жылдык мөөнөткө жайгаштырылган 850 млн сомдук облигациянын жылдык үстөгү 6%, ал эми он жылдык 1 млрд 400 млн сомдук облигациянын купондук үстөгү 8% деп белгиленген.
Купондук төлөмдөр жылына эки жолу – 26-ноябрда жана 26-майда төлөнөт.
Талдоолор көрсөткөндөй, Финансы министрлиги жыл башынан бери (май айын кошкондо) 23,8 млрд сомдук мамлекеттик казыналык облигация чыгарды. Мекеме 2025-жылы жалпысынан 34 млрд сомдон ашуун баалуу кагаз чыгарууну пландаган.
| Жайгаштырылган айы | МКОну чыгаруу көлөмү, сом | Купондук үстөгү, % | Жүгүртүү мөөнөтү, жыл |
| 2025-жыл, январь | 4,7 млрд | 5-8 | 3-10 |
| 2025-жыл, февраль | 4,2 млрд | 6-7 | 5-7 |
| 2025-жыл, март | 5,5 млрд | 5-8 | 3-10 |
| 2025-жыл, апрель | 7,15 млрд | 6-7 | 3-7 |
| 2025-жыл, май | 2,25 млрд | 6-8 | 5-10 |
Мамлекеттик казыналык облигациялар өлкө ичиндеги булактардан каражат тартуунун ыкмасы болгондуктан алар мамлекеттин ички карыздарына кошулат. Баалуу кагаздардын мөөнөтү эл аралык насыяларга салыштырмалуу кыска жана үстөк пайызы жогору болот.
Шерине