Самидин Атабаев Ош шаарынын казысы болуп дайындалды

Самидин Атабаев 26-майда Ош шаардык казыяттын башчысы болуп дайындалды. Бул тууралуу Кыргызстан мусулмандар дин башкармалыгы кабарлады.

52 жаштагы Атабаев буга чейин Ысык-Көл облусунун казысы болуп иштеп келген. Ал жогорку диний билимди 1991-1995-жылдары Бишкектеги Ислам институтунда, андан кийин, 2002-2006-жылдары Орусиянын Казан шаарында алган.

Эмгек жолун 2006-жылы Өзгөн районундагы медреседе баштаган. Буга чейин Өзгөндүн башкы имамы, Ош облусунун казысы болуп да иштеген.

Ош шаарынын буга чейинки казысы Мирланбек Токтомушев кармалганы 23-майда ырасталган. Улуттук коопсуздук комитети (УКМК) көптөн бери бул казыятта мыйзамсыз акча чогултуу фактылары болгонун, "такай жасалып келе жаткан мыйзамсыз иштерге бөгөт коюлганын" билдирген.

Токтомушев бир күндөн кийин эле үй камагына чыккан. Ош шаардык соту ага айып катары коюлуп жаткан кылмыштын түрү оор деп эсептелерин билдирип, бирок туруктуу жашаган дареги, жашы жете элек эки баласы бар экени, мурда соттолбогону, саламаттыгы начар экени, жакында эле дарыланып чыкканы эске алынганын маалымдаган.

Ал өзү соңку окуялар тууралуу комментарий бере элек. Муфтият дагы Ош шаарынын буга чейинки казысынын кармалганы тууралуу үн каткан эмес.