Ички иштер министрлиги (ИИМ) Бишкектеги жолдордун бириндеги айдоочулардын ортосундагы чырга аралашкан жарандын тек-жайы аныкталганын, ал күч түзүмдөрүнүн кызматкери эмес экенин билдирди.
Жарандарды "коомчулукту адаштырган, укук коргоо органдарына ишенимди кетирүүгө алып келген жалган маалыматтарды" таратуудан алыс болууга чакырды.
Мунун алдында социалдык тармактарда жолдо чырдашкан адамдарын видеосу тараган жана араздашкандардын бири өзүн "коопсуздук кызматкери" деп айтып жатканын көрүүгө болот.
ИИМдин басма сөз кызматы тараткан видеодо ал жаран күч түзүмдөрүнүн кызматкери эмес экенин мойнуна алган жана ишкерлик менен алектенерин, аны менен чырдашкан жаран видеону өзү каалагандай монтаждап чыгарып койгонун айткан.
Өткөн айда Жол кыймылынын коопсуздугун камсыздаган кызматкерлерге баш ийбей, өзүн "офицер" катары тааныштырып орой сөздөрдү айтып жаткан жарандын видеосу тараган. Улуттук коопсуздук комитети (УКМК) ал жаран менен профилактикалык сүйлөшүү жүргүзүлгөнүн, бажы кызматкери болгонун билдирген. УКМК анын кечирим сураган видеосун да жарыялаган.
Көп өтпөй Бажы кызматы ал адам жумуштан алынганын кабарлаган.